Tungutækni er nýleg grein í örum vexti og því eru sífellt að koma fram ný og ný hugtök og fyrirbæri innan greinarinnar. Íðorðaforði hennar fer því ört vaxandi, en þessu fylgir jafnframt að ekki er komin festa á merkingu og notkun allra íðorða í greininni. Þetta á við um ensku, en þróun greinarinnar fer að langmestu leyti fram á enskumælandi málsvæðum. En vitaskuld á þetta enn frekar við um íslensku. Fyrir því eru tvær ástæður. Annars vegar er greinin enn nýrri hér en víðast í grannlöndunum, og hins vegar láta Íslendingar sér venjulega ekki nægja að taka erlend íðorð upp óbreytt eða lítillega aðlöguð, heldur vilja smíða ný orð af íslenskum efniviði. Þó er orðið til talsvert af íslenskum íðorðum. Mörg þeirra er að finna í einhverju eftirtalinna safna, sem gerð er nánari grein fyrir hér á eftir:

• Orðabanki Íslenskrar málstöðvar
  
• Tölvuorðasafn
  
• Margmála skrá um íðorð í máli og tali
• Ensk-íslensk lykilorðaskrá um tungutækni og skyld svið

Sumarið 2005 var unnið að samningu íðorðasafns í tungutækni. Eiríkur Rögnvaldsson hafði frumkvæði að verkinu og stjórnaði því, en Valdís Ólafsdóttir vann verkið, sem var unnið fyrir fé sem norræna tungutækniáætlunin veitti íslensku upplýsingasetri í tungutækni. Orðasafnið var opnað sem hluti af Orðabanka Íslenskrar málstöðvar haustið 2005.

Gerð hefur verið skrá með um 40 íðorðum úr tungutækni og skyldum greinum og samsvörunum þeirra í 10 Evróputungumálum (íslensku, ensku, dönsku, norsku, sænsku, finnsku, þýsku, hollensku, frönsku, spænsku) og alþjóðamálinu esperanto. Þessa skrá er að finna hér. Krækjur eru úr íslensku orðunum í Orðabanka Íslenskrar málstöðvar, ef þar er að finna skýringar á þeim.