19.2. 2002

Mat á umsóknum á lokastigi

Nú er unnið að því að meta þær ríflega tuttugu umsóknir sem bárust menntamálaráðuneytinu um stuðning við tungutækniverkefni, í kjölfar auglýsingar ráðuneytisins þar um þann 14. nóvember sl. Umsóknarfrestur var til 15. desember 2001. Annars vegar voru auglýstir styrkir til fyrirtækja sem vilja þróa og markaðssetja tiltekin tungutækniverkfæri. Hins vegar er um að ræða stuðning við hagnýtar rannsóknir, söfnun upplýsinga, gerð gagnagrunna o.fl. sem hafa það að markmiði að gera iðnfyrirtækjum, sem vilja hasla sér völl á sviði tungutækni, fært að framleiða hugbúnað eða önnur verkfæri tungutækni á arðvænlegan hátt.

Í matsnefnd um umsóknirnar eiga sæti þau Ebba Þóra Hvannberg, dósent í tölvunarfræði, Helga Waage tölvunarfræðingur og Jón G. Friðjónsson, prófessor í íslensku. Ráðgert er að tilkynna um úthlutanir fljótlega.