Talgervill les nýjustu fréttir af mbl.is

Stöðugt fleiri nýta sér fréttasíma Morgunblaðsins og Hex sem hleypt var af stokkunum í vor. Fréttasíminn hefur nú fengið nýtt númer, 904 1100, og þar er hægt að hlusta á talgervil lesa nýjustu fréttir af fréttavef Morgunblaðsins, mbl.is. Einnig er hægt að hlusta á ýmsar aðrar hagnýtar upplýsingar s.s. íþróttafréttir, fréttir af viðskiptum og flugsamgöngum.

Fréttasíminn er samstarfsverkefni Morgunblaðsins og Hex hugbúnaðar, sem vinnur m.a. að þróun lausna á sviði tungutækni og gervigreindar. Tungutæknikerfi Hex sér um lesturinn og geta notendur hlustað á yfirlit frétta og fengið fréttir lesnar í fullri lengd, ef þess er óskað. Upplýsingarnar eru sóttar um leið og hringt er inn og því tryggt að alltaf er um nýjustu fréttir að ræða.