Ráðstefna um tungutækni og kennslu í þýðingum

Stofnun Vigdísar Finnbogadóttur í erlendum tungumálum stendur fyrir ráðstefnu um tungutækni og kennslu í þýðingum dagana 13. og 14. maí nk. Ráðstefnan er hluti af starfsemi norræns nets um tungutækni og kennslu í norrænum tungumálum sem öðru máli og erlendu tungumáli. Netið er styrkt af NorFA, norrænu rannsóknaakademíunni, og er stýrt af Stofnun Vigdísar Finnbogadóttur.

Á ráðstefnuninni sem haldin verður í Odda, Háskóla Íslands, fjalla helstu fræðimenn Norðurlanda á sviði tungutækni og þýðinga um fagið frá ýmsum sjónarhornum. Gefið verður yfirlit yfir vélrænar þýðingar, fjallað um tungutækni og þýðingar í samhengi við tölvustudda tungumálakennslu, möguleikar veraldarvefsins verða skoðaðir í ljósi tungumálakennslu og þýðinga auk þess sem fjallað verður um þjálfun sérfræðinga í tungumálum til þýðinga fyrir alþjóðastofnanir og um tungumálaumhverfi þeirra sem skrifa á tungumálum öðrum en móðurmálinu.