Tæknifyrirtækið HEX, sem þróað hefur aðferðir til að koma hljóðum, lifandi myndum, tali og texta úr farsímum á netið eða af netinu í farsíma, er komið á lista 200 athyglisverðustu nýsköpunarfyrirtækja heims í bandarísku tímariti um fjárfestingar í hátækni.

Tímaritið Red Herring í Kaliforníu sérhæfir sig í umfjöllun um fjárfestingar í tæknifyrirtækjum og velur árlega hundrað athyglisverðustu nýsköpunarfyrirtæki heims og nú í vikunni voru undanúrslit 200 fyrirtækja tilkynnt, en endanlegur listi hundrað fyrirtækja verður kynntur í desember. HEX er eina íslenska fyrirtækið á listanum, en Oz var þar líka fyrir nokkrum árum.

HEX hefur áður verið í fréttum vegna talandi tölvukerfa sem taka einnig við munnlegum fyrirskipunum. Þannig er hægt að gefa fyrirskipanir um þjónustu, á mannamáli, senda SMS eða panta efni af netinu. Lausnirnar eru aðeins í notkun hér á landi ennþá, hjá Og Vodafone, en stefnt er á erlenda markaði og á tilnefning á lista Red Herring að hjálpa þar til. Sex starfsmenn vinna hjá HEX.