Verkefnisstjórn um tungutækni gekkst í gær fyrir ráðstefnu í Salnum í Kópavogi í tilefni af því að tungutækniverkefni menntamálaráðuneytisins lýkur um áramótin. Tilgangur ráðstefnunnar var að kynna afrakstur verkefnisins, og voru sjö verkefni kynnt í sex erindum, auk þess sem formaður verkefnisstjórnar gaf yfirlit yfir verkefnið og ráðuneytisstjóri menntamálaráðuneytisins flutti ávarp menntamálaráðherra. Hátt í 70 manns sóttu ráðstefnuna sem tókst mjög vel. Við upphaf tungutækniverkefnisins fyrir þremur árum hélt verkefnisstjórnin einnig ráðstefnu um tungutækni í Salnum, og er mjög ánægjulegt að sjá hversu mikið hefur áunnist síðan þá. Fyrstu skrefin í íslenskri tungutækni hafa verið stigin og nú skiptir miklu máli að haldið verði áfram og byggt á þeim grunni sem lagður hefur verið með tungutækniverkefninu.

Kynningar áðurnefndra verkefna hafa verið gefnar út í bæklingi, sem einnig hefur að geyma ávarp menntamálaráðherra og yfirlit Rögnvaldar Ólafssonar verkefnisstjóra um verkefnið. Bæklinginn má lesa hér í heild, en einstakar greinar er einnig að finna undir Greinar um tungutækni.