Fjórði fyrirlestur Tungutækniseturs á þessum vetri verður haldinn í sal K5 í Háskólanum í Reykjavík, Kringlunni 1 (gamla Morgunblaðshúsinu) föstudaginn 7. mars og hefst kl. 12:00. Fyrirlestari er  Trond Trosterud frá Háskólanum í Tromsø í Noregi, og nefnist fyrirlestur hans "Language technology for Sámi, Faroese and Greenlandic: A presentation of ongoing work in Tromsø".

Trond Trosterud er dósent (førsteamanuensis) í samískri tungutækni við Háskólann í Tromsø. Hann hefur unnið mikið að uppbyggingu tungutækni á fámennum málsvæðum, og hefur ekki síst beitt til þess endanlegum stöðuvélaaðferðum með góðum árangri. Hann hefur m.a. unnið að stöðlun samísks lyklaborðs, gerð málgreiningarbúnaðar fyrir samísku og færeysku, og gerð leiðréttingarforrita fyrir samísku og vestur-grænlensku. Í fyrirlestrinum mun hann kynna starf sitt á þessu sviði og helstu verkefni sem hann og samstarfsmenn hans vinna nú að.